बज्जिका लहर: लागे जाड़ न माघ - पूस में, लागे जब बहे बतास / कवि- मृदुल

   लागे जाड़ न माघ - पूस में, लागे जब बहे बतास

मृदुल 

लागे जाड़ न माघ - पूस में, लागे जब बहे बतास

इहे समइया जिनगी सिमटे घुरा बोरसी के पास 

          सरदी बढ़े एत्ता जे से

          नाक से टपटप चूये नेटा

          कुत्ता - गीदड़ हबके - झबके

          हाथ पकड़े पड़े सोंटा

धीओ - पुता तंग करइअ, लेबे न देइय तनको सांस

          तमाकुल के खेत न कट्टल

          सब्भे कुछ है ओझराएल

          पोसिया माल के दूध न उतरल

          कइसे जाय फरियाएल

दुब्भी -मोथा, ठरकल - ठिहुकल, खाली मिले फुलहर कास

          फुला रहल हन गहूम - खेसारी

          है झबरल रहरी, सरसो

          बचा लीअहू भगवान हे एकरा

          देख न कोई तरसो

एकरे पर महाजन सब्भे, इहे पर घर भर के आस

          एतने में दऽ संस बऽरक्कत

          धीआ - पुता आगे बढ़े

          ऊब्बड़ - खाब्बड़, सूख्खल - भींगल

           उ सब सीढ़ी पर पहिले चढ़े

बहे केतनो अन्हर - बउखी, न टूटे जिनगी के रास.
......

कवि - मृदुल 

संपर्क :- साहित्य निकेतन, रसलपुर, बघड़ा, समस्तीपुर (बिहार) पिन - 848506

मोबाइल - 9939460183, 7677568899

इमेल – mridulsahitya@gmail.com,  mukeshkumarmridul@gmail.com

प्रतिक्रया इहो ईमेल पर भेज सके हS -  hemantdas_2001@yahoo.com